حياة البنت والمراه في ماضي (قطر)

**أحلى المشاعر** · 24-06-2008, 12:43 AM

~*¤ô§ô¤*~السلام عليكم ورحمة الله وبركاته~*¤ô§ô¤*~

جارتنا سيدة كبيرة في السن وأنا اعتبرها مثل
أمي (الله يرحمها ) سوالفها حلوة ودايماً تتكلم
عن الماضي وأنا اموووت في هالسوالف .
بس هالمرة حبيت أنقل لكم سوالفها عن حياة
البنت والمرأة في الماضي ونشوف الفرق بينها
وبين البنات الحين .

البنات : كانوا يشتغلون في البيوت يحلبون الغنم والبقر
يخضون الحليب في ( الاسقا ) المصنوع من جلود الحيوانات
ويحضرون الماي من الجليب وينقلون الماي في اليود ( الدلو )
يخيطون الملابس بيدهم ويصنعون البخنق والملفع النقدة .
كانت لهم مهن وأعمال .. وإذا صار عمرهم 13 أو 14 يلبسون
البطولة على البخنق ولا يحطون حنة ولا كحل ..ولإذا حد طق
الباب ماتفتح البنت .

تجيهم الخطابة بدون ماتدري البنت وتطلبها من أمها وأبوها
في المسجد يملكون على البنت بدون ماتدري .. ولا تشوف
خطيبها إلا إذا كانت البنت ماعنده أبو تشوف خطيبها من
فتحة الباب ، ويجيبون البنت ورى الباب عند المطوع ووليها
إذا كان أخوها أو عمها أو خالها ويسألونها تقبل فيه والا
لا ؟ وإذا سألوها ثلاث مرات وماجاوبت يعني موافقة .

وتحديد العرس على حسب .. أسبوع أسبوعين .. ويفاجئون
البنت بالموعد .. وتكون البنت ياية من البر تجيب الحطب أو
الحشيش وتتفاجأ ان في البيت يجهزون حق العرس .

العرس : أهل المعرس يطرشون الدزة وبعضهم يطقون
الطبول عليها ، وهذي الدزة فيها ثياب العروس :
( الثوب - اسراويل - البطاطيل - العباية - ثوب وغترة
وبشت حق أبوها أو اخوانها - عطورات - نعل - وكل
حاجات العروس ) ويحطون الذهب والفلوس .

البنت يدخلونها بيت أهلها ويحطون عندها ( العسو )
وهي تصيح فالليل ( يماااا ..يماااا ) ويحطونها في
الزولية ويحنونها ويغنون عليها عقب العرس ويخلونها
في ( الخلة ) : وهي غرفة يجهزونها بالمناظر والفرش
وتكون ألوانها خضرة ، سبع أيام .. يفصخون بطولتها
يخلونها بدون بطولة وماتطلع الشارع إلا بعبايتها ...

وبعد الأسبوع تبدأ ترجع لشغلها ( تحلب الغنم وتنظف
البيت وتجيب الحطب ) وتصير هي البنت في بيت زوجها
وتخدم أم زوجها وزوجها ، وإذا زوجها في الغوص
تفصخ ثياب العرس وتخليها في الصندوق وتشتغل .

وعقب شهر من زواجها تروح تزور أهلها ويسوون لها
عشاء خفيف إما برنيوش أو سمك ( يريور ) واللي بيكون
عندهم ، ويحطون ساقو ومحلبية وعقيلي المكون من
بيض وطحين يطبخونه عالفحم ، والهريس والحلوى والرهش
وكله من مكونات الدزة هذي فالة العروس من بيت المعرس
وبعد قواطي الأنناس والخوخ والكمثرى وقواطي كنار .

والعروس ماتطلع من بيتها بعد العرس مثل الحين
ويغنون عليها بعض الأغاني مثل :
حناج عيين يالعروس حناج عيين
لي دزوج على المعرس بالج تستحين
حناج ورق يالعروس حناج ورق
لي دزوج على الخلة صبج العرق

وإذا زوجها يشتغل في الغوص وبيرجع لي يستوي
أربع شهور يحسبونها بعدد حبات القهوة كل يوم
يحطون حبة عشان يعرفون الأيام ( ثلاث أو أربع
شهور ) .

وتبدأ الزوجة تحط الحنة مثل العروس وتحط الرشوش
في الشعر ومشموم أخضر وينقشون الحنة مربعة أو
مدورة .. وعلى ظهر اليد اسم زوجها وتجلس لي المغرب
تنتظر زوجها وبعدين تلبس الثياب الحلوة والملفع النقدة
والبطولة الرياسي ( عليها ذهب ) وهذاك السير الي يوصل
لي الركبة والشعر يكون معقص ( معجف ) بالمشموم
وتعطر الفرش ._ أول العروس عروس والحياة حياة .. مب
الحين .. في الفندق والصبح في الطيارة _ . @@ .

ويقولون : لاتودونها يوم السبت أو الثلاثاء أو
الأربعاء بيت زوجها . يودونها يوم الأثنين تنقل
لبيت زوجها وتصير راعية البيت . والخلة يسكرونها
سبع أيام ماحد يدش قبل العروس أو المعرس .

أم العروس توصي جيرانها وحبايبها البيت بيتكم كلهم
يساعدونها ويضيفون الناس كل الأهل يقومون بالواجب
وأم العروس تكون في المطبخ مشغولة .

والعزيمة للعرس ( يطرشون ثنتين من أهل المعرس
وثنتين من أهل العروس ) ان الأكل سبع أيام في
بيت العروس ، أسبوعين يشتغلون في بيت العروس
الله مبارك لهم ، يدخلون العروس لاعندهم ليت ولا شي
يقطونها على المعرس ولي صار الفجر يودونها يحنونها
ويكحلونها و معاها ( الداية ) ترافق العروس وتساعدها
وتزينها وبعدين يعطونها من كل شي من دزة العروس .
( هذي من بدال الكوافيرة الحين ) يحطون حق العروس
بياض البيض وشوية كركم يمشون على وجهها عشان
تستوي حلوة عقب الشمس والغبار .. أحسن من هالصبغ
الحين يخرب الويه .

يحفون وجهها بالخيط عشان تتنظف هذا كله ليلة الحنة
مع التزيين ولي سبع أيام تعدلها ( العدالة ) وأم المعرس
تسوي مخمرية تطرش مئة ريال البحرين ويجيبون لها أنواع
العطور مثل ( الرازجي ، الزعفران ، دهن الورد ، المشموم ،
دهن الصندل ، ... ) من كل هالعطور ويخلطونها في غرشة
كبيرة لي أسبوع يخمرونها .

شاكره لكم حسن مروركم ...

**النهشلي** · 04-08-2008, 06:27 PM

ماشاء الله عليج إختنا أحلى المشاعر موضوع جميل ومميز ويعنى بالموروث الشعبي والحياه في وطرٍ مضى
لكِ جزيل الشكر ودمتِ بحفظ الله

**أحلى المشاعر** · 13-08-2008, 05:15 PM

تسلم اخوي النهشلي على مرورك الحلو ..ولاهنت يا الغلا ..

ودايما اقول مالنا غنى عن القديم والتراث {{ وقديمك نديمك لو الجديد أغناك}}

{{ والي ماله أول ماله تالي }} ..

يعطيك العافيه وربي يحفظك ..